pages 755, 756

Pages 755, 756

*******

SANT KADO

Eskoh ha Merzer (VIet kantved)

Enoromp ive sant Kado, en em gav e ouel en de-man. 

Ganet oa en Breiz-Veur, ha mab oa da roue Glamorgan, an hini e chomas sant Iltud eur pennad en e zervij. O vezan kuitaet ar bed, e savas eun abati en Lankarvan hag e vodas ennan 300 manac'h. Ne chomas ket pell gante, kement a c'hoant an evoa da vevan didrous ha dizanve. E vue a dremenas o veaji. Baie reas dre bep korn a Vreiz-Veur hag a Iverzon, elec'h ma labouras da brezek ar fe gant sant Gweltas.

Mont a reas ive da Vro-C'hall, da Rom ha betek da Jeruzalem. O tizrei eus an Itali, e touaras en eun enezennig etre Gwened hag Alre, hag e savas eno eur manati, demdost d'e vignon sant Gweltas.

A-benn nebeut, avat, Doue hen galvas adarre da vont, pelloc'h. War a greder, e tizroas da Vreiz-Veur, e oe girêt eskob Benaven ha lazet eno gant ar Zôzon.

Sant Kado a zo brudet en Breiz-Izel, elec'h n'eo pedet ouz ar gouliou hag evit al loened. Bezan eo ive patron an dud a vrezel. Ar Vretoned o vont da Stourm an Tregont, ar 26 a viz meurs 1351, a bede anezan evellen :

Otro sant Kado, hon paeron, 

Roët-hu d'imp-ni nerz-kalon, 

Ma c'honefomp, hirie an deiz, 

War enebourien eus a Vreiz.

Mar deomp-ni d'ar gêr war hon c'hiz, 

Ni a roi d'ec'h-hu eur gouriz.

Ma laro an dud o sellet, 

Otro sant Kado binniget : 

Kouls er baradoz hag en douar, 

Sant Kado n'en deus ket e bar.

Bezan 'n eus eur chapel en Karnot. En Plouillio e ve gret e bardon ar pevare zul a viz here. Enoret eo ive en Sant-Kleve hag en Lomikel-an-Trêz.

----------------

KENTEL
Darempredomp ar Zent

Eürus, eme sant Thomas a Gempis, an hini hag; elec'h klask e ziskuis e-touez an dud, hen klask el levriou santel hag er pedennou birvidik, a vev ervat hag a gar treo an nenv, evel ma rê ar zent, a zelle muioc'h ouz ar pez a wel daoulagad ar fe eget ouz ar pez a wel daoulagad ar c'horf. Pep-hini a zarempred an dud a zo herve e galon; ar c'hristen mat a zarempred kristenien vat; ar c'hristen klouar a zarempred kristenien klouar; ar c'hristen fall a zarempred kristenien fall.

Ma fell d'ec'h eta azezan, kador ouz kador, gant ar zent er baradoz, eo red d'ec'h gouzanv eleiz a dreo evit Doue war an douar-man, ha karet an dismeganz evel m'o deus grêt an dud santel-ze, rak ne dalv ket nemeur a dra enori ar zent dre gomzou, ma rêr gwap aneze dre oberou.

Ma fell d'ec'h plijout da Zoue ha plijout d'ar zent, kastizet ho korf, pleget ho polonte hoc'h-unan, stourmet ouz ho techou fall laket vertuziou da zevel ennoc'h, sellet ouz bue ar zent, lennet o c'helen'nadurez, ha neuze, ma tarempredet evelse ar zent, e vefet sent, e vefet skoazellet gant ar zent ha kurunet gante en baradoz an Otrou Doue.

*******

Geriadurig lexique Evit komz diouzh al levr-se / pour discuter de cet ouvrage : Academia Celtica